Gullbrá Bangsadóttir bloggar

Kærleikur

Fri, 03 Oct 2008 13:07:45 GMT

Þótt ég talaði tungum manna og engla,
en hefði ekki kærleika,
væri ég hljómandi málmur eða hvellandi bjalla.
Kærleikurinn er langlyndur,
hann er góðviljaður.
Kærleikurinn öfundar ekki.
Kærleikurinn er ekki raupsamur,
hreykir sér ekki upp.
Hann gleðst ekki yfir óréttvísinni,
en samgleðst sannleikanum.
Hann breiðir yfir allt,
trúir öllu,
vonar allt,
umber allt.
Kærleikurinn fellur aldrei úr gildi.

1 korintubréf 13

Minningarsjóður mágkonu minnar

Thu, 28 Aug 2008 16:12:17 GMT

Minningarsjóður

Stefaníu Guðrúnar Pétursdóttur

Stefanía dó 27. ágúst árið 2003 af slysförum á Spáni aðeins 18 ára að aldri og ákváðu foreldrar hennar í kjölfarið að opna heimasíðu: www.kaerleikur.is og í beinu framhaldi minningarsjóð – kærleikssjóð Stefaníu Guðrúnar Pétursdóttur – til heiðurs þessari yndislegu stúlku. Síðan hefur verið í undirbúningi útgáfa á CD disk sem nú er kominn út með frábærum listamönnum og er diskurinn glæsilegur í alla staði enda mikil og vönduð vinna sem liggur að baki :

1. Kærleikur – Óðmenn

2. Ólýsanleg – Magnús Þór Sigmundsson

3. Allt í himnalagi – Regína Ósk

4. Ég lifi í draumi – Eyjólfur Kristjánsson og Björgvin Halldórsson

5. Losing a friend – Nylon

6. I think of angels – KK og Ellen Kristjánsdóttir

7. Lífsbókin – Bergþóra Árnadóttir

9. Þegar ég fer – Hera Björk

9. Vorið kemur ( Vikivaki ) Diddú og Valgeir Guðjónsson

10. Ást – Ragnheiður Gröndal

11. Stefanía – Valgerður Ólafsdóttir

12. Sól að morgni – Bubbi

13. Kramið hjarta – Helgi Björnsson og Regína Ósk

14. Söknuður – Vilhjálmur Vilhjálmsson

Allir styrkir renna beint í sjóðinn en hann mun aðstoða þá foreldra sem eiga um sárt að binda eftir fráfall ungmennis og er þetta eini minningasjóður sinnar tegundar hér á landi. Þeir sem vilja styrkja sjóðinn um 2500 krónur eða meira fá þennan fallega geisladisk.

1. júlí

Tue, 01 Jul 2008 21:23:08 GMT

Jamm, það er 1. júlí í dag. Bara að minna sjálfa mig á það því þegar ég lít út um gluggann á litla krúttlega húsinu mínu við Norðurgötuna á Siglufirði gæti allt eins verið október! Ég er ekki að grínast. Það er hífandi rok, grenjandi rigning og ískalt. Hér hefur snjóað í fjöll og jafnvel verið frost á næturnar. Meðalhitastigið þessa vikuna hefur verið um 5 gráður. Ég fékk reyndar voðalega gott veður í síðustu viku, allt upp undir 20 stig og ég naut þess að liggja í sólbaði upp á hvern einasta dag. Sundlaugin var minn helsti viðkomustaður á milli viðtala og var það afar ljúft.

En svona er víst að búa á Íslandi - það skiptast á skin og skúrir - eins og í lífinu sjálfu - svo mikið er víst.

Nú er fjórða og síðasta vikan mín hér á Sigló gengin í garð. Það er búið að vera alveg yndislegt hérna en verð þó að viðurkenna að ég hlakka til að koma heim á ný eftir þessa útlegð. Gaman að hugsa til þess að þegar ég kem heim í Vesturbergið verð ég gift kona! Það styttist óðfluga í brúðkaupið og tilhlökkunin jafnvel meiri eftir alla þessa fjarveru.

P.S Ég hef nú greitt allar mínar skuldir við Fjallabyggð og er orðin launþegi og skattgreiðandi sveitarfélagsins.

Ég bið að heilsa í sólina!

Fyrir bókasafnsfræðingana og fleiri

Thu, 12 Jun 2008 22:05:17 GMT

Á Siglufirði er bókasafn, en það er ekkert venjulegt bókasafn. Það er opið þiðjudaga, miðvikudaga, fimmtudaga og föstudaga frá kl 14-17 (virðist reyndar vera algengur opnunartími verslunar og þjónustu hér í bæ). Bókasafnið er lokað í júlí. Bókakosturinn er ekki skráður í Gegni. Bókasafnssírteini eru óþörf, konan í afgreiðslunni skrifar einfaldlega nafnið þitt á miða á þar til gerð spjöld, ásamt útlánsdegi og titla bóka. Síðan er spjaldinu raðað í kassa eftir stafrófsröð lánshafa.

Ég spurði eftir bókum um meðgöngu og fæðingu. Konan sagði strax að það væru til tvær svoleiðis bækur í eigu safnsins en önnur þeirra væri týnd. Hún þurfti ekki að fletta upp í tölvunni til þess. Síðan fór hún að leita fyrir mig og fann eina bók og lánaði mér. Þegar kom að afgreiðslu sagði hún: "Þetta gera 30 krónur, nei, 50 krónur." Líklega hefur verðið hækkað í kreppunni eins og allt annað og konan enn að venjast breyttu verðlagi. Ég sagðist því miður ekki vera með neina peninga á mér, enda sannleikanum samkvæmt því ég geng nánast aldrei með peninga á mér, aðeins kort. Hún sagði að það gerði svosem ekkert til ég gæti borgað þegar ég skilaði! Og ef ég næði ekki að skila fyrir sumarlokun safnsins skyldi ég skila bókinni og greiða skuld mína á Bæjarskrifstofunni. Nú skulda ég sem sagt Siglufjarðarbæ 30 krónur.

Bestu kveðjur frá Sigló!

Tíminn flýgur áfram...

Mon, 21 Apr 2008 20:11:01 GMT

... mér finnst eins og páskarnir hafi verið bara í síðustu viku - ég get svarið það! Páskafríið var mjög ljúft norðan heiða, það var farið í heimsóknir til vina og ættingja, slappað af í sveitinni hjá mömmu og pabba, farið í leikhús á Fló á skinni og grenjað af hlátri, farið í vettvangsferð til Siglufjarðar, farið í heimsókn til Steina PÉ og fleira skemmtilegt 8)

Þegar heim var komið biðu mín tveir góðir menn úr Vestmannaeyjum, annar þeirra er skipasmiður en hinn er í stjórn sjómannadagsráðs í Eyjum. Það voru sem sagt tvö viðtöl tækluð sama daginn, annað vegna vinnunnar, hitt vegna útvarpsþáttar sem ég er að vinna að þessa dagana. Fullt af spennandi verkefnum í gangi. Hef reyndar verið haldin einhverjum verkkvíða undanfarið en nú er komin tími til að spýta í lófana eins og þar stendur...

Sýningarhópurinn í Hagnýtri menningarmiðlun fór í allsherjar sýningarferð um Suðurnesin í lok mars. Það var bara skemmtilegt og fengum við Eydís að fljóta með mæðgunum og sæta voffanum þeirra ;) Það var farið á Saltfisksetrið í Grindavík, og Björn, sýningarhönnuður fræddi okkur um leyndardóma sýningarinnar. Eftir það fórum við út að borða í hádeginu og síðan var haldið í Fræðasetrið í Sandgerði og loks farið í Duus hús í Reykjanesbæ. Rokksýningin rokkaði ekki feitt að mínu mati, en hitt stóð alveg fyrir sínu, meira að segja svona í annað sinn.

Ræðuhópurinn í Hagnýtri menningarmiðlun stóð fyrir ráðstefnu í byrjun apríl undir heitinu "Menningarbræðingur." Góður bræðingur þar á ferð, og virkilega skemmtilegt að heyra ólík erindi. Ég og Eydís vorum ráðstefnustjórar og kynntum erindi hinna, og líka hvor hjá annarri :)

Í apríl er ég líka búin að fara á ráðstefnu í Þjóðmenningarhúsinu, eiga fund með formanni Íslenska vitafélagsins, hlusta á Árna Björnsson tala um pyntingar, fara á málstofu mastersnema í sagnfræði, fara í þriðja sinn í Saltfisksetrið, fara í mæðraskoðun, fagna afmæli tengdamömmu og fara í frábæra sumarbústaðaferð :haha:

-Það skelfilegasta var kviksetningin á Þjóðminjasafninu
-Það áhugaverðasta var farandverkafólkið á ormétnum dínum
-Það yndislegasta var að heyra hjartslátt barnsins sem vex innan í mér :d
-Það skemmtilegasta var að eiga tíma með stelpunum í bústað

Spaugstofan

Sat, 29 Mar 2008 20:18:19 GMT

Íslenskur þjóðfræðingur í hnotskurn - eða kannski bara ég að predika sjómannalögin? :lol: Þessi minnti mig samt meira á "neftóbaksfræðing"

Dánarfréttir og jarðarfarir

Thu, 27 Mar 2008 17:35:31 GMT

Ástkær hundurinn minn, Bóbó, lést þann 11. mars síðastliðinn. Blóm og kransar vinsamlegast afþakkaðir en þeim sem vilja minnast hans er velkomið að rita um hann falleg orð hér að neðan.

Bóbó var afar sérstakur karakter. Hann var þrjóskur og þver og vildi fara sínar eigin leiðir. Hann var trygglindur mjög og húsbóndahollur. Bóbó var með afar lítið hjarta og óttaðist ýmislegt, þó ekkert jafn mikið og flugelda. Hann var einstaklega barngóður og ljúfur hundur. Bóbó veiktist af lifrarbólgu fyrir tæpu ári og veikindin urðu honum erfið. Hann einangraðist mjög félagslega og mátti ekki hitta aðra hunda í hálft ár vegna smithættu. Á þeim tíma þróaði hann með sér þunglyndi og varð afar dapur. Við eigendurnir gerðum auðvitað allt sem í okkar valdi stóð til að reyna að gleðja hann og gengum meira að segja svo langt að fá annann hund á heimilið. Eitthvað kættist hann við það en því miður var ýmislegt annað að hrjá hann sem gerði honum lífið leitt. Það var ekki fyrr en Birta Sól kom inn á heimilið sem við áttuðum okkur á því að ekki voru allir bulldog hundar eins og hann Bóbó okkar. Þau voru gjörsamlega eins og hvítt og svart og okkur varð ljóst að Bóbó þjáðist. Birta Sól var aftur á móti lífsglöð og kát og eins heilbrigð og nokkur hundur getur verið. Hún hefur nú fengið gott heimili á Patreksfirði. Því er búið snautt.

Aldrei hefði það hvarflað að mér að ég ætti eftir að láta svæfa gæludýrið mitt! Hélt að það væri eitthvað sem aðeins harðbrjósta manneskjur gætu gert. En í ljósi langvarandi veikinda hundsins og aðstæðna heima fyrir þá var ekki um annað að ræða. Þetta var auðvitað með erfiðustu ákvörðunum sem við höfum tekið en vonum að við höfum breytt rétt - ekki síst hundsins vegna sem nú er komin á fund feðra sinna og þjáist ekki meir.

Maður er manns gaman - en engu að síður er hundurinn hans besti vinur.

Er ekki komin tími til að blogga...

Sun, 16 Mar 2008 10:17:49 GMT

Orðið alltof langt síðan síðast, svo ég hef þetta bara í punktaformi.

Laugardaginn 9. febrúar fórum við í 4 ára afmæli Söru Ísoldar ofurprinsessu með meiru :)

Sunnudaginn 10. febrúar fórum við í sextugs afmæli til Þorgríms hennar Auju

13. febrúar kom Svana vinkona í bæinn, sjaldséður hvítur hrafn í Reykjavík ;)

14. febrúar fengum við fyrirlestur frá Agli Helgasyni í hagnýtri menningarmiðlun og það var bara gaman að því og ef til vill hagnýtt

Föstudaginn 15. febrúar fór ég á þorrablót Þjóðbrókar ásamt Írisi vinkonu og þar hittum við margt gott og skemmtilegt fólk 8)

Sunnudaginn 17. febrúar fór ég í leikhús á Jesús Krist ofurstjörnu, skemmtileg rokkuppfærsla þar á ferð:!: Svo var félagsskapurinn alveg súper - Gellurnar í El saumos - en þær einmitt gáfu okkur Björgu gjafabréf í leikhús og út að borða í 25 ára afmælisgjöf og komu auðvitað allar með :d

18. febrúar fórum við svo í fyrstu mæðraskoðunina og hittum ljósmóðurina í fyrsta sinn. Það var auðvitað mjög gaman og spennandi 8)

20. febrúar hélt ég fyrirlestur í húsi Sögufélagsins við Fishersund. Þetta var kynning BA ritgerða fyrir Félag þjóðfræðinga og Eiríkur kynnti sína ritgerð einmitt sama kvöld. Okkur gekk báðum ljómandi vel (þó ég segi sjálf frá) og fjölmiðlafárið lét ekki á sér standa ;)

22. febrúar kom Linda vinkona til landsins og 23. febrúar fórum við tvær í útskriftarveislu til Rakelar ofurgellu:!: Rosa gaman að skreppa svona sveitarúnt og fara í veislu í Kjósinni

26. febrúar fór ég til einkaþjálfara - í annað sinn á árinu - rosa dugleg. Er að æfa 3-4 sinnum í viku og hef bæði gott og gaman af því :lol: Um kvöldið var ég með saumaklúbb fyrir El saumos skvísurnar mínar og bauð upp á pönnukökur með ís og ávöxtum

28. febrúar kom Ósk mágkona og hélt Enjo kynningu hjá mér - næsta kynning 7. apríl ;)

2. mars átti Eygló vinkona 25 ára afmæli og í tilefni dagsins kom hún í heimsókn til mín - hvað annað :haha: Kíkti í smá stund með Óla sínum og Davíð var hér líka :) Sama dag fórum við í afmæliskaffi til Eddu mágkonu sem varð þrítug 3. mars

5. mars hélt ég fyrirlestur um sjómannalög og gúanórokk á Sjóminjasafninu. Fyrirlesturinn hélt ég fyrir Vitafélagið og enn á ný fékk ég símhringingu frá Rúv og ég beðin um að koma í viðtal 8) Standandi á bryggjunni í nýju salarkynnum Sjóminjasafnsins fílaði ég mig í botn, umgjörðin hefði ekki getað verið betri :d

8. mars kom Linda að norðan og við fórum á búðarráp. Um kvöldið fórum við svo í afmælispartý til Eyglóar og hittum skemmtilegar skvísur :)

11. mars fórum við í þriggja mánaða sónar og það var ólýsanlega yndislegt:!:

12. mars fór ég á stefnumót á Kaffivagninum niður á Granda ;) Hitti þar ekki bara einn föngulegan heldur 10-15 föngulega skipasmiði í tengslum við verkefni mitt á Þjóðháttasafninu. Alltaf stuð í vinnunni :lol: Um kvöldið fórum við Íris á konukvöld í Smáralindinni og skemmtum okkur vel :)

15. mars fór ég að hitta einn föngulegan skipasmið og tók viðtal við hann. Þegar ég kom heim voru bæði Björg vinkona og tengdamamma í heimsókn :) Um kvöldið fór ég út að borða á Austur Indíafélagið með þjóðfræðiskvísum. Fengum rosa góðan mat og áttum skemmtilega kvöldstund :)

Jæja þetta er orðið gott - á ég ekki skilið að fá smá kvitt???

Glymur hæst í tómri tunnu!

Mon, 25 Feb 2008 20:59:16 GMT

Æji voru þessi ummæli Friðriks Ómars ekki alveg óþörf í undankeppni eurovision á laugardaginn? Það fannst mér. Hvað sem öllum fordómum kann að líða. Fordómar gagnvart Gilznegger og félögum hafa nú ekki verið minni! Fannst einhvern veginn óþarfi af honum að demba slæmum móral keppenda yfir á þjóðina. Annars var ég ánægð með úrslitin og óska Friðriki Ómari og Regínu Ósk alls hins besta.

Over and out

Heilagur Valentínus

Thu, 14 Feb 2008 22:09:29 GMT

Jæja eru ekki allir búnir að fá koss frá ástinni sinni, súkkulaði og rósir?
Hér á bæ var nú ekki haldið neitt sérstaklega upp á daginn nema bara með því að ræða væntanlegt brúðkaup og skipuleggja í kringum það :haha: Bara gaman.

Síðustu tvær helgar hafa verið átveislur miklar, farið í afmæli laugardag og sunnudag, tvær helgar í röð - geri aðrir betur! Held að maður sé hreinlega komin með vömb af öllu þessu áti! Svo eru enn fleiri afmæli framundan...

Í sumar hefst mikið ævintýri - síldarævintýri á Siglufirði:!: En þar hefur mér boðist að gera lokaverkefni mitt í hagnýtri menningarmiðlun sem ég stefni á að landa í október :)

Rósa sísaltandi síldarstúlka

Bollu, sprengju, ösku...

Fri, 08 Feb 2008 13:21:03 GMT

Ég er viss um að ástæða þess að enginn karlmaður sýndi mér áhuga í síðustu færslu er sú að ég var titluð þjóðhagfræðingur í símaskránni. Nú hefur það verið leiðrétt og nú heiti ég mínum rétta titli, sem er auðvitað mun virðulegri ;)

Það hefur margt skemmtilegt á daga mína drifið undanfarið. Saumaklúbbur með el saumos skvísum, matarboð með þjóðfræðiskvísum, afmæli og kaffiboð. Bolludeginum var fylgt eftir með bolluáti og sprengidagurinn var haldin hátíðlegur. Ósk, Gulli og krakkarnir komu í saltkjöt og baunir og ég gerði þessa líka fínu baunasúpu :D Ég fór ekki í búning á öskudaginn og fékk ekkert nammi og söng engin lög en borðaði þess í stað afganginn af baunasúpunni góðu. Það var annar í sprengidag hjá mér.

Á öskudaginn hitti ég tvær góðar vinkonur mínar og flottu strákana þeirra. Annar var batman en hinn var hann sjálfur, eða kannski var hann að leika pabba sinn þegar hann var lítill?

Í kvöld er svo safnanótt, ég verð á Þjóðminjasafninu, hvar verður þú?

Karlmaður óskast!

Fri, 01 Feb 2008 08:53:00 GMT

Ung, falleg, ljóshærð, hávaxin og tiltölulega grönn kona óskar eftir nánum kynnum við karlmann. Maðurinn verður að vera fæddur á bilinu 1960-1990. Viðkomandi verður að vera tilbúin til að deila lífshlaupi sínu til þessa með mér og allri þjóðinni og tilbúin til að opinbera þann 15. maí. Karlmaðurinn mun svo vera til sýnis á Þjóðminjasafninu frá 15. maí til 15. september en óþarfi er að stoppa viðkomandi upp, lífshlaupi hans verður gert skil með öðrum hætti.

Aðeins hraustir karlmenn koma til greina, ekki verra að viðkomandi sé hávaxinn, myndarlegur og vel vaxinn upp og niður. Sannir íslenskir karlmenn koma sterkir inn en einnig Pólverjar, Tailendingar og Filippseyingar eða aðrir þeir sem misst hafa vinnuna sökum samdráttar í fiskvinnslu.

Vinsamlegast skiljið eftir mynd, nafn og síma og ég mun hafa samband eins fljótt og auðið er.

Laser nr 2

Mon, 28 Jan 2008 19:19:07 GMT

Á föstudaginn fór ég í laser aðgerð á augunum - aftur! Við læknirinn vorum nefnilega ekki alveg nógu ánægð með útkomuna eftir fyrri aðgerðina svo við komum okkur saman um að gera aðra aðgerð, mér að kostnaðarlausu, að sjálfsögðu. Ég get ekki sagt að þetta hafi verið þægilegt og var ég frekar slæm á aðgerðardaginn en strax daginn eftir var ég eins og ný manneskja ;) Ég er allavega komin með arnarsjón og rúmlega það 8) Ef það er einhver þarna úti að spá í að fara í svona aðgerð þá mæli ég hikluast með Eiríki hjá Laser Sjón, hann er frábær læknir:!:

Ég verð að segja að þrátt fyrir veikindi unnustans er gleðin við völd, frekar en hitt, það er svo margt í þessu lífi til að vera þakklátur fyrir :D

Svo takk kæru vinir!

Fjórir litlir vinir

Wed, 23 Jan 2008 09:42:42 GMT

Ég á fjóra litla uppáhaldsvini og ég hitti þá alla í gær :haha:

og það lítur út fyrir að ég fái líka að hitta þá alla í dag :haha:

Blessuð börnin eru sannkallaðir gleðigjafar :)

Þjóðhagfræðingur!

Mon, 21 Jan 2008 16:40:27 GMT

Flestir þeir sem lagt hafa stund á þjóðfræði hafa lent í því oftar en einu sinni og oftar en tvisvar að vera beðnir um að útskýra hvað þjóðfræði er. Oftar en ekki er viðkvæðið: já þú ert þjóðhagfræðingur, einmitt. Nei þjóðfræðingur. Og vegna þessa leiða misskilnings er ég skráð sem þjóðhagfræðingur í símaskránna 2008!

Rósa þjóðhagfræðingur :$